Goditet për vdekje me veturë një 80-vjeçar në Prizren, shoferi dyshohet të jetë polic

Një këmbësor është goditur për vdekje nga një automjet në rrugën "Ismajl Kryeziu" në Prizren pasditen e së premtes. Rastin për Klankosova.tv e ka konfirmuar zëdhënësi i Policisë për rajonin e Prizrenit, Shaqir Bytyqi. Sipas Bytyqit, i vdekur ka mbetur një 80-vjeçar. “Menjëherë pas marrjes së informatës, në vendin e ngjarjes kanë dalë njësitë policore përkatëse si dhe eprorët policorë”, tha ai. Tutje, Bytyqi bëri të ditur se i dyshuari në këtë rast është një zyrtar policor nga Prizreni, i cili në momentin e aksidentit ka qenë jashtë detyrës zyrtare dhe ka qenë duke lëvizur me veturë private. I dyshuari aktualisht ndodhet në Stacionin Policor të Prizrenit. “Për veprimet e mëtejshme administrative dhe penale do të koordinohemi me Inspektoratin Policor të Kosovës (IPK) dhe Prokurorin Kujdestar, për çka do të njoftoheni me kohë. Lidhur me rastin janë njoftuar Prokurori i Shtetit dhe Inspektorati Policor i Kosovës, të cilët janë duke u marrë me procedurat e nevojshme hetimore”, tha ai për Klankosova.tv.