Hapet ekspozita muzeale në kullën e Ahmet Delisë në Prekaz

Në kullën e Ahmet Delisë, e ndërtuar për herë të parë në gjysmën e dytë të shekullit të 19-të, nga sot përmes një ekspozite shfaqet kronologjia historike që do të qëndrojë si testament i jetës së heroit Ahmet Delia. “Përmes artefakteve ftohemi të udhëtojmë në veprimtarinë dhe sakrificat e një luftëtari të lirisë i cili ishte i angazhuar në një sërë fushatash ushtarake dhe kuvende popullore. Beteja e tij e fundit në dhjetorin e vitit 1912, ku Delia i armatosur vetëm me sëpatë mbron gjitonët, vulos figurën e tij në traditën epike dhe qëndresës shqiptare në Kosovë”, thuhet në njoftimin e MKRS-së. Ekspozita e realizuar nga KnKub Heritage, mbështetet nga Ministria e Kulturës.