Hapet panairi i verës “Cakrrojmë gotat” në Rahovec

Sot në Rahovec u bë hapja e panairit të verës “Cakrrojmë gotat”, një ngjarje kjo që do të vazhdojë edhe më 28, 29 dhe 30 dhjetor 2024 në rrugën “Xhevat Kasapi” në këtë qytet. Kryetari i komunës, Smajl Latifi, në një postim në Facebook thekson se ky panair, i organizuar nga Komuna e Rahovecit në bashkëpunim me Shoqatën e Verëtarëve të Kosovës, sjell në zemër të qytetit traditën dhe cilësinë e verës më të mirë nga e gjithë Kosova. “Ky panair është i rëndësishëm, ku veraritë tona prezantojnë punën, pasionin dhe produktet e tyre unike. Ju ftoj të gjithëve që të merrni pjesë, të shijoni verërat më cilësore dhe të përjetoni mikpritjen e Rahovecit!” “Bashkërisht po promovojmë traditën tonë të verës, zhvillimin ekonomik dhe kulturor të qytetit tonë. Mirë se vini në Rahovec, në Panairin e verës “Cakrrojmë gotat”! ?”, shkroi tutje Latifi.