Haradinaj mbështetë notarët kosovarë në garat e tyre ndërkombëtare

Organizimi në Kosovë, i Kampionatit Botëror të Notit për Personat me Sindromën Down, është një nga ngjarjet më të rëndësishme që ka ndodhur në fushën e sportit. Për herë të parë Kosova po bëhet nikoqir i notarëve nga e gjithë bota. Me këtë rast kryeministri Ramush Haradinaj, priti në takim presidentin e Komitetit Olimpik Botëror të Notit për Persona me Sindromë, Geoff Smedley, Kryetarin e Klubit “Termopan” Lulzim Zhdrella, fituesen e medaljes së artë dhe argjend në garat e notit Medina Surdulli, garues dhe përfaqësues të tjerë nga sporti i notit. “Sportistët kosovarë çdo ditë e më shumë po dëshmojnë se janë ambasadorët më të mirë të vendit në botë. Me arritjet e tyre në sporte të ndryshme, siç është rasti i Medinës ata sollën në Kosovë medalje të arta, duke na bërë krenarë në arenën ndërkombëtare”. Kryeministri Haradinaj falënderoi presidentin e DSISO, Smedley për hapësirën që po i jep notarëve kosovarë në përfaqësimet ndërkombëtare, për të cilin fakt siç tha Kryeministri, Kosova po fiton. Haradinaj theksoi gatishmërinë e Qeverisë së Kosovës për të ndihmuar sportistët në Kosovë, duke vlerësuar lartë rolin dhe gatishmërinë e tyre për të përfaqësuar Kosovën në sportet ndërkombëtare. “Medina dhe notarë të tjerë me sindromën Down na bëjnë krenarë me angazhimin e tyre dhe do ta kenë përkrahjen e parezervë të Qeverisë”. Në fund të takimit, Kryeministri Haradinaj i dhuroi presidentit të Komitetit Olimpik Botëror të Notit për Persona me Sindromë, Geoff Smedley dhe Medina Surdullit medaljen e Skënderbeut.

klankosova.tv