Helmimi nga ushqimi me salmonelë në kopshtin në Gramsh, 6 fëmijë në spital

Gjashtë fëmijë janë shtruar në spital pas helmimit nga ushqimi me salmonelë një ditë më parë në kopshtin Nr 1, në Gramsh. Kështu ka njoftuar policia e cila bëri me dije se janë bërë analizat për të gjithë fëmijët dhe personelin e këtij kopshti si dhe është bërë bllokimi i produkteve ushqimore të mbetura në kuzhinë. Njoftimi i policisë: Specialistët për Hetimin e Krimit në Komisariatin e Policisë Gramsh referuan materialet procedurale në Prokurorinë pranë Gjykatës së Shkallës së Parë të Juridiksionit të Përgjithshëm Elbasan, për vlerësim, pasi më datë 24.05.2025 është marrë dijeni nga rrjetet sociale se në Kopshtin Nr.1 Gramsh janë helmuar nga salmonela disa nga fëmijët e këtij kopshti. Në spitalin e Gramshit janë paraqitur për të marrë ndihmë mjekësore 6 fëmijë dhe janë bërë analizat për të gjithë fëmijët dhe personelin e këtij kopshti. Në cilësinë e provës materiale janë sekuestruar Kartelat Klinike për 6 pacientët e shtruar në spitalin e Gramshit, janë sekuestruar Procesverbalet e kontrollit dhe furnizimit me produkte ushqimore të Kopshtit Nr.1, si dhe janë marre mostrat nga ushqimi për ekzaminime të mëtejshme në kushte laboratorike. Gjithashtu, është bërë dhe bllokimi i produkteve ushqimore të mbetura në kuzhinën e këtij kopshti. Të gjitha veprimet janë kryer nën drejtimin e Prokurorisë së Juridiksionit të Përgjithshëm Elbasan./EuroNews