Hoxhaj: E dhimbshme të shohësh qytetarët që shtyhen për vaksina

Ushtruesi i detyrës së kryetarit të PDK-së, Enver Hoxhaj ka reaguar lidhur me turmat e njerëzve që janë krijuar para sallës "1 Tetori" për të marrë vaksinat ndaj koronavirusit. Përmes një postimi në Facebook, Hoxhaj është shprehur se është për keqardhje që prindërit dhe gjyshërit  për një vaksinë e cila nuk u erdhi për një kohë të gjatë, shtyhen me njëri-tjetrin. " Është për keqardhje të shohësh prindërit e gjyshërit tanë në këtë gjendje. Të dëshpëruar për një vaksinë e cila nuk u erdhi për një kohë të gjatë, tani të shtyhen me njëri-tjetrin sepse Qeveria nuk ka ditur të organizoj një proces të thjeshtë vaksinimi. Kështu, më shumë ekziston rreziku që ata të infektohen me Covid, sesa mundësia që të vaksinohen. Kjo është pasqyra e një qeverisje pa plan e program. Pa dije e përvojë për të ndihmuar qytetarët e saj. E dhimbshme. Shumë e dhimbshme", ka shkruar ai, transmeton Klankosova.tv.