Presidenti i KOK-ut: Krenar me Kianën, skitaren e parë nga Kosova në Olimpiadë dimërore

Komiteti Olimpik i Kosovës (KOK), ka prezantuar ekipin olimpik që do të marrin pjesë në Lojërat Olimpike Dimërore Pekin 2022, përmes një konference për media. Presidenti i KOK-ut, Ismet Krasniqi, ka thënë që është krenar me sportistët Kiana Kryeziu dhe Albin Tahirin të cilët do e përfaqësojnë Kosovën në këto Lojëra Olimpike. "Për herë të parë Kosova do të ketë dy sportistë të cilët do të garojnë në Lojërat Olimpike, të cilat për vendin tonë është një debutim i dytë i radhës. Kiana Kryeziu e cila i ka vetëm 17 vjet ka arritur që të kualifikohet që të garojë në këto lojëra shumë të rëndësishme në Pekin", tha ai. "Ajo çka na bën krenar neve është që Kiana është vajza e parë nga Kosova e cila në lojëra të tilla. Në Olimpiadën e Pekinit marrin pjesë 90 shtete, që do të thotë që 105 shtete të tjera nuk kanë arritur të kenë sportistë dhe kjo neve na bën krenar duke pasë parasysh që përkundër që vendi jonë e ka një infrastrukturë jo të mirë dhe ka arritur të ketë dy sportistë të kualifikuar për këtë garë vërtetë është një e arritur shumë e madhe", tha tutje ai. Ndërsa gjatë konferencës, skiatori Albin Tahiri ka thënë se ndihet krenar që do të garojë me flamurin e Kosovës në këto lojëra. "Ndjehem shumë krenar që do ta përfaqesoj Kosovën në Pekin. Falendëroj KOK-un dhe federatën që më dhanë edhe një mundësi dhe gjithmonë ndihem krenar kur garoj me flamurin e Kosovës", tha ai.