Hyseni (PSD): Gjendja në shëndetësi nuk ka ndryshuar, është alarmante

Nënkryetari i Partisë Socialdemokrate Zgjim Hyseni, ka folur rreth aksionit të kësaj partie që u zhvillua para Ministrisë së Shëndetësisë, ku u vendos një alarm me moton "Ministër çu prej gjumit". Hyseni tha në Edicionin Special në Klan Kosova se gjendja në shëndetësi është alarmante. "Gjendja e Shëndetësisë mund të themi se ka ndyshuar por s'mund të themi se ka ndryshuar për mirë. Ne do t'i kemi edhe aksione të tjera për ta bërë shëndetësinë alarm. Sepse gjendja është Alarmante" -tha Hyseni. Ai tha se këto aksione po bëhen që ministri Rifat Latifi, të lëvizë. "Javën e kaluar e kemi shtruar një tepih të kuq, sepse e kemi parë që ministri është merak në glamur, hije dhe veshje të rëndë. Dhe thamë që ndoshta në tepih të kuq vjen dhe sheh se çka ka në QKUK. Sot një zile tek Ministria e Shëndetësisë për t'i thënë "Lëviz Ministër" sepse kështu nuk do të presin njerëzit" - theksoi ai.