I kërkuar për drogë, dyshohet se lëviz i armatosur - policia po punon intensivisht për ta kapur Fazli Nrecajn

Fazli Nrecaj, që nga 7 tetori i vitit të kaluar, po vazhdon të jetë në arrati. I njëjti është i dyshuar në rastin e 500 kilogramëve narkotikë, konkretisht veprat penale "kultivimin e bimëve narkotike, blerjen, posedimin dhe shitjen e paautorizuar të substancave psikotrope", si dhe "mbajtjen e paautorizuar të armëve". E për kapjen e tij po punohet intensivisht. Kështu deklaroi për Klankosova.tv Shaqir Bytyqi, zëdhënës i policisë për rajonin e Prizrenit. Ai iu bëri thirrje edhe qytetarëve që të bashkëpunojnë me autoritetet. "Personi në fjalë është në kërkim, lidhur me dyshimet për veprat e përmendura më lart. Për rastin janë njoftuar të gjitha njësitë përgjegjëse. Policia e Kosovës është duke punuar intensivisht për lokalizimin dhe arrestimin e tij. Njëkohësisht, Policia u bën thirrje të gjithë qytetarëve që, nëse kanë ndonjë informacion lidhur me vendndodhjen e personit në fjalë, të njoftojnë Policinë në numrin 192 ose në stacionin më të afërt policor", deklaroi Bytyqi për Klankosova.tv. Derisa në media, ditëve të fundit u raportua se 46-vjeçari është parë duke lëvizur i armatosur nëpër fshatrat e Suharekës duke krijuar shqetësim edhe te qytetarët. https://klankosova.tv/policia-kerkon-ndihmen-e-qytetareve-per-arrestimin-e-nje-te-dyshuari-per-dro1ge/