India në frikë se mund ta pësojë sikur Spanja për shkak të qëndrimit kundër Kosovës

India rrezikon që të humbë të drejtën për të organizuar ngjarje sportive ndërkombëtare në të ardhmen, nëse boksierja e vetme nga Kosova, Donjeta Sadiku nuk do të lejohet që të marrë pjesë në Kampionatin Botëror të Femrave. Këtë frikë e ka Komiteti Olimpik i Indisë (KOI). Kampionati nis të enjten por që thuhet se ende është e turbullt situata rreth pjesëmarrjes së Sadikut nën flamurin e AIBA-së pasi që Qeveria e Indisë ende nuk e ka lëshuar vizën për të dhe dy trajnerët e saj, shkruan Timesnownews, përcjell Klan Kosova. India nuk e njeh pavarësinë e Kosovës – por që prej kur Sadiku ka marrë edhe pasaportën e Shqipërisë, Federata e Boksit të Indisë ka shpresuar në zgjidhjen e kësaj çështjeje. India ka marrëdhënie të vëna diplomatike me Shqipërinë. “Komiteti Olimpik Ndërkombëtar në të kaluarën i ka dërguar letër Federatës Ndërkombëtare që të mos caktojë në Spanjë ngjarje të mëdha pasi që atletët nga Kosova nuk janë lejuar që të marrin pjesë nën flamurin shtetëror në Kampionatin Botëror të Karatesë. Kurrë nuk i dihet, India mund të jetë e radhës”, ka thënë për PTI një zyrtar i Komitetit Olimpik të Indisë pa dashur t’i përmendet emri. “Për KON, sporti dhe politika janë dy anët e një monedhe. KON nuk e përzien sportin me politikën dhe pret që edhe vendet anëtare ta përcjellin këtë udhëzim”. Zyrtari nga India ka thënë se Kosova është lejuar që të marrë pjesë në Lojërat Olimpike Rio 2016 pavarësisht që Brazili nuk e ka njohur si shtet. Kryetari i Federatës së Boksit të Indisë, Ajay Songh, ka thënë se janë duke diskutuar këtë çështje të ndjeshme me qeverinë e vendit. “Jemi ende duke folur me Ministrinë e Jashtme. Është çështje e ndjeshme, nuk dua të komentoj më shumë. Po merremi me çështjen”, ka thënë Singh. “Është çështje më e madhe dhe jo vetëm për Indinë. Është çështje globale dhe duhet dialog në mes të të gjitha palëve për ta zgjidhur problemin. Nuk është çështje që lidhet vetëm me boksin, por më e madhe. Do të flasim edhe me qeverinë dhe do të shohim se çfarë do të ndodhë Singh ka thënë se Komiteti Olimpik Ndërkombëtar duhet të merret me këtë problem. “Është çështje edhe për shumë vende të cilat nuk e kanë njohur Kosovën. Duhet të gjendet zgjidhja në mes të KON dhe të gjitha vendeve sepse këtu përfshihen shumë vende perëndimore”. “Nga perspektiva jonë, ne duam që të ndjekim udhëzimet e KON. Por në fund të fundit vendimi për dhënien ose jo të vizës është çështje e pavarur. Komiteti Olimpik Ndërkombëtar u ka bërë thirrje federatave ndërkombëtare që të mos caktojnë mbajtjen e ngjarjeve të mëdha sportive në Spanjë nëse ata nuk garantojnë pjesëmarrjen e sportistëve nga Kosova./Klan Kosova/