iPad-i i Papës u shit për 30,500 dollarë në një ankand bamirësie

Ju mund të blini iPad-in më të fundit të Apple-it për më pak se 500 dollarë, po ky iPad special është shitur për 30,500 dollarë në një ankand bamirësie. Pse? Sepse ai është përdorur më parë nga Papa Françesku, dhe ka një mbishkrim të veçantë në anën e pasme. Ky iPad i Papës u shit për 30,500 dollarë gjatë një ankandi bamirësie të organizuar këtë javë në Uruguai. Të gjithë lekët do të investohen në një shkollë për të varfrit. Emri i blerësit të iPad-it është mbajtur sekret. Në anën e pasme të iPad-it është ky mbishkrim: “His Holiness Francisco. Servizio Internet Vatican, March 2013.” iPad-i ka logon zyrtare të Vatikanit dhe një tastierë Logitech në ngjyrë të zezë. Bashkë me iPad-in, blerësi ka marrë edhe një certifikatë të nënshkruar nga Vatikani. Në Vatikan përdoren shumë iPad-ët për të komunikuar në mediat sociale. Në vitin 2011, për shembull, është postuar cicërima e parë nga llogaria zyrtare e Vatikanit nëpërmjet një tableti Apple. Papa ka dhuruar për bamirësi edhe motoçikletën e tij Harley Davidson, i cili u shit gjatë një ankandi bamirësie për 250,000 dollarë.