Irani në thatësi, fillon punën për procesin e njohur si "mbjellja e reve"

Autoritetet në Iran kanë spërkatur retë me kimikate për të shkaktuar shi, në një përpjekje për të luftuar thatësirën më të keqe të vendit në dekada. I njohur si "mbjellja e reve", procesi u krye mbi pellgun e liqenit Urmia të shtunën, raportoi agjencia zyrtare e lajmeve e Iranit Irna. Urmia është liqeni më i madh i Iranit, por është tharë kryesisht duke lënë një shtrat të gjerë kripe. Operacione të mëtejshme do të kryhen në Azerbajxhanin lindor dhe perëndimor, tha agjencia. Reshjet janë në nivele rekord të ulëta dhe rezervuarët janë pothuajse bosh. Javën e kaluar presidenti Masoud Pezeshkian paralajmëroi se nëse nuk do të ketë reshje të mjaftueshme së shpejti, furnizimi me ujë i Teheranit mund të racionohet dhe njerëzit mund të evakuohen nga kryeqyteti. Mbjellja e reve përfshin injektimin e kripërave kimike, përfshirë argjendin ose jodurin e kaliumit, në re nëpërmjet avionëve ose nëpërmjet gjeneratorëve në tokë. Avujt e ujit mund të kondensohen më lehtë dhe të shndërrohen në shi. Teknika ka ekzistuar për dekada të tëra dhe Emiratet e Bashkuara Arabe e kanë përdorur atë vitet e fundit për të ndihmuar në adresimin e mungesës së ujit. Organizata meteorologjike e Iranit tha se reshjet kishin rënë me rreth 89% këtë vit krahasuar me mesataren afatgjatë, raportoi Irna, shkruan BBC, transmeton Klankosova.tv.