Irani paralajmëron mbrojtjen e qytetarëve kinezë në mes të tensioneve SHBA–Izrael

Ministri i Jashtëm i Iranit, Abbas Araghchi, ka premtuar se Teherani do të bëjë maksimumin për të garantuar sigurinë e qytetarëve dhe institucioneve kineze në vend, në mes të luftës së nisur nga SHBA-ja dhe Izraeli. Sipas Ministrisë së Jashtme kineze, Araghchi e bëri deklaratën gjatë një bisede telefonike me homologun e tij kinez, Wang Yi, ku u diskutua situata e sigurisë dhe kundërpërgjigjja e Iranit ndaj sulmeve. Araghchi tha se Uashingtoni ka nisur luftë kundër Iranit për herë të dytë gjatë negociatave në vazhdim, duke theksuar se, sipas tij, raundet e fundit të bisedimeve kishin shënuar progres pozitiv. Sulmet e SHBA-së dhe Izraelit nisën të shtunën, pak pasi ministri i Jashtëm i Omanit kishte deklaruar se një marrëveshje paqeje ishte më afër se kurrë. Sipas njoftimit të Pekinit, Wang Yi shprehu mbështetjen e Kinës për sovranitetin dhe integritetin territorial të Iranit, duke i bërë thirrje SHBA-së dhe Izraelit të ndalin menjëherë veprimet ushtarake për të shmangur përshkallëzimin e mëtejshëm në rajon. Biseda vjen në një kohë kur marrëdhëniet Pekin–Teheran mbeten të ngushta. Kina dhe Irani kanë nënshkruar një marrëveshje strategjike 25-vjeçare në vitin 2021, ndërsa Pekini ka mbështetur përfshirjen e Iranit në forume si BRICS dhe Shanghai Cooperation Organisation.