Irani sulmon vendet e Gjirit me raketa dhe dronë, rriten çmimet e naftës

Irani ka ndërmarrë një valë të re sulmesh me raketa dhe dronë ndaj disa vendeve të Gjirit Persik, në ditën e 13-të të luftës me Shtetet e Bashkuara të Amerikës dhe Izraelin, duke rritur tensionet në rajon dhe çmimet e naftës në tregjet globale. Në Bahrein, autoritetet u kërkuan banorëve të qëndrojnë brenda shtëpive pasi një sulm goditi rezervuarë karburanti në provincën Muharraq. Shteti i Gjirit, që strehon flotën e pestë të marinës amerikane, ka qenë shpesh objektiv gjatë konfliktit, shkruan Aljazeera, transmeton Klankosova.tv. Arabia Saudite njoftoi se ka rrëzuar disa dronë që po drejtoheshin drejt fushës së naftës Shaybah, ndërsa në Kuvajt dy persona u plagosën pasi një dron goditi një ndërtesë banimi. Emiratet e Bashkuara Arabe raportuan për një kërcënim me raketa, ndërsa një anije kontejnerësh u sulmua pranë portit Jebel Ali. Konflikti ka shkaktuar rreth 2 mijë viktima dhe ka tronditur tregjet e energjisë. Çmimi i naftës Brent është rritur në rreth 100 dollarë për fuçi, mbi 38 për qind më shumë krahasuar me periudhën para nisjes së luftës.