“Ishte në Itali për djalin, papritmas u ndje keq”, flet vëllai i Shpat Kasapit

Vdekja e papritur e Shpat Kasapit në moshën 40-vjeçare ishte tronditëse për familjarët, miqtë dhe të gjithë ata që e njihnin. Ai ndodhej në Itali bashkë me ish-bashkëshorten e tij dhe djalin e tyre, Roelin, për ta dërguar atë në kontroll mjekësor, kur në orët e vona të së martës ishte ndier papritur keq dhe ka ndërruar jetë. Kështu ka treguar vëllai i Shpatit, Albini, në një intervistë për Top Channel. Sipas tij, ndihma e parë mjekësore i ishte dhënë Shpatit në banesë, por ai nuk kishte arritur të mbijetonte. Albini tha se deri tani dyshohet se shkak i ndarjes nga jeta ka qenë një arrest kardiak. Albini ka treguar se Shpati ka pasur disa shqetësime të vogla nga zemra, por siç tha ai, jo diçka serioze. Trupi i tij ndodhet në Itali, ndërsa në vijim pritet që të kryhen procedurat për të mbërritur pranë familjarëve, transmeton Klankosova.tv.