Isufaj: “Engel ka qenë gjithmonë derë e hapur për përfaqësuesit shqiptarë” (VIDEO)

Frymëzim Isufaj, ish-konsull i Kosovës në New York, ka thënë se vdekja e kongresistit Eliot Engel, është humbje e madhe për tërë popullin shqiptar. Në Info Magazine në Klan Kosova, Isufaj tha se ai ka qenë ndër zërat më të fortë të shqiptarëve në Kongresin amerikan. “Eliot Engel ishte një mik i madh, dhe zëri më i fuqishëm të cilin Kosova e kishte në Kongres. Me dhimbje shumë të madhe, sot mendoj se është njëri nga ata përfaqësuesit ose zërat më të fortë të shqiptarëve në Kongresin amerikan që u nda nga jeta, dhe të gjithë shqiptarët humbën një mik dhe zë të fuqishëm në Kongres”, deklaroi Isufaj. Ai tha se me ndihmën dhe lobimin e tij, u arrit që suksesshëm të bindet ShBA-ja dhe i gjithë komuniteti ndërkombëtar për të ndihmuar Kosovën në ditët e saj më të vështira. Isufaj përmendi një kontribut shumë të madh që kongresisti Engel kishte për lirinë dhe pavarësinë e Kosovës. “Ai punoi pandërprerë edhe në forcimin dhe afirmimin e çështjes së Kosovës, duke ndihmuar edhe në njohje të reja, po edhe në fushën e zhvillimit ekonomik. Këtu duhet të përmendim sidomos marrëveshja e fundit me ShBA-në, ajo me MCC-në, nga e cila marrëveshje Kosova fillimisht përfitoi 29 milionë dollarë dhe ajo e fundit në vlerë prej 200 milionë dollarësh. Kongresisti Engel dhe stafi i tij dhanë një kontribut shumë të rëndësishëm”, deklaroi ish-konsulli i Kosovës në Nju Jork. Ndër të tjera, Isufaj tha se dera e zyrës së Engelit ka qenë gjithmonë e hapur për të gjithë shqiptarët. Ai tha se mesazhet e tij ndonjëherë nuk janë dëgjuar me kujdes nga elita politike në Kosovë. “Ne kemi pasur kontakte të vazhdueshme me zyrën e Engel, dhe ka qenë derë e hapur gjithmonë për çdo përfaqësues nga Kosova, Shqipëria dhe çdo vend ku jetojnë shqiptarët. Ai ka qenë aq i mishëruar me çështjen e Kosovës dhe në baza ditore ka qenë i informuar me zhvillimet që ndodhnin në Kosovë. Mesazhet e tij kanë qenë gjithmonë mesazhe të një miku të sinqertë të Kosovës, të cilat nganjëherë nuk janë dëgjuar me kujdes. Por ai gjithmonë ka bërë thirrje për avancim të interesave të Kosovës dhe natyrisht, gjithmonë në bashkëpunim dhe koordinim të ngushtë me ShBA-në. Mund të përmend shumë çështje, siç është lobimi i tij për njohje sidomos në vende të Amerikës Latine, pastaj me shtetin e Izraelit para se të njihte Kosovën, ku ai dha një kontribut të çmueshëm”, tha Isufaj. https://youtu.be/tnlTqDK2Tho