James Franco i rikthehet aktrimit 4 vjet pas akuzave për sjellje të pahijshme seksuale

James Franco do të rikthehet në ekranin e argjendtë, katër vjet pasi u përball me akuza për sjellje të pahijshme seksuale. Sot THR konfirmoi se artisti 44-vjeçar është marrë për rolin e peshkatarit në dramën Me, You. Filmi vjen nga regjisori Bille August, i cili është më i njohur për punën e tij në "The House of the Spirits" të vitit 1993 dhe adaptimin "Les Misérables" të vitit 1998. Kasti përfshin gjithashtu Tom Hollander dhe Daisy Jacob. Sipas mediumit, prodhimi i filmit pritet të fillojë në shtator. “Jam i ngazëllyer për të hyrë në këtë projekt fenomenal dhe për të punuar me legjendarin Bille August. Unë jam fans i madh i punës së tij dhe Me, You është një skenar vërtetë i shkëlqyer", tha James në një deklaratë. James u largua nga aktrimi pasi pesë gra dolën për ta akuzuar atë për sjellje të papërshtatshme seksuale në një artikull të botuar nga Los Angeles Times në janar 2018. Dy nga viktimat e supozuara, Sarah Tither-Kaplan dhe Toni Gaal, ngritën padi për sjellje të pahijshme seksuale kundër James më 2019 dhe ata arritën një marrëveshje më 2021, në të cilën aktori ra dakord të paguante 2 milionë e 235 mijë dollarë. James theu heshtjen e tij për akuzat në dhjetor 2021, duke zbuluar se ai kishte luftuar me varësinë ndaj seksit për vite me radhë dhe pranoi se i “tradhtonte të gjithë" para lidhjes me të dashurën e tij aktuale.