Jared Kushner tërhiqet nga projekti “Trump” në Beograd pas protestave dhe aktakuzave

Jared Kushner është tërhequr nga zhvillimi i planifikuar me markën “Trump” në Beograd, pasi projekti nxiti protesta të gjera dhe çoi në aktakuzën e një politikani të lartë serb. Të hënën, një prokuror i posaçëm ngriti aktakuzë ndaj një ministri të kabinetit dhe tre zyrtarëve të tjerë për shkak të projektit, i cili parashihte ndërtimin e tre kullave në një lokacion qendror të Beogradit, i bombarduar dikur nga NATO. “Meqenëse projektet kuptimplota duhet të bashkojnë e jo të ndajnë, dhe në respekt të popullit të Serbisë dhe të Qytetit të Beogradit, po e tërheqim aplikimin tonë dhe po tërhiqemi në këtë fazë”, tha një zëdhënës i “Affinity Partners”, fondit privat të Kushnerit, disa orë më vonë, raporton WSJ, transmeton Klankosova.tv. Kjo shënoi fundin e papritur të një projekti gjithnjë e më kontrovers, për të cilin Kushner – tashmë figurë publike dhe ndërmjetës i rëndësishëm marrëveshjesh – kishte punuar për më shumë se dy vjet. Dhëndri i Presidentit Trump fillimisht kishte thënë se nuk do të kthehej në shërbimin qeveritar, por tani po merr një rol të madh gjeopolitik, duke u ofruar të ndihmojë në udhëheqjen e negociatave amerikane për përfundimin e luftës Rusi–Ukrainë, pas një roli të ngjashëm në Gaza. Në të njëjtën kohë, ai drejton “Affinity Partners”, një fond privat investimesh prej 4.8 miliardë dollarësh, i financuar kryesisht nga qeveri të Lindjes së Mesme dhe aktiv globalisht. Ky fond është pjesë e një blerjeje rekord prej 55 miliardë dollarësh të “Electronic Arts” dhe po ndihmon në financimin e ofertës armiqësore të “Paramount” për “Warner Bros”. Ngërçi në Serbi nisi kur administrata e presidentit Alleksandar Vuçiq synoi të hiqte mbrojtjen e trashëgimisë kulturore nga ish-kompleksi ushtarak që planifikohej t’i transferohej kompanisë së Kushnerit. Prokuroria ndërhyri duke arrestuar një zyrtar për dyshime për falsifikim dokumentesh dhe duke nisur hetime më të gjera. Në reagim, partia në pushtet miratoi me shpejtësi dy masa në Parlament, duke ia hequr statusin e mbrojtur lokacionit dhe disa ndërtesave të tjera publike. Kundërshtarët e cilësuan veprimin antikushtetues dhe korruptiv, duke akuzuar qeverinë se po kërkonte favore nga ShBA. Serbia, e lidhur historikisht me Moskën, por edhe me interesa të forta në Perëndim, kërkon nga administrata Trump, ndër të tjera, heqjen e sanksioneve ndaj rafinerisë së saj të vetme të naftës. “Ju e quani investim, ne e quajmë tradhti të lartë”, tha në Parlament deputetja opozitare Marinika Tepiq. Mijëra studentë protestuan në rrugë dhe paralajmëruan se do ta pushtonin lokacionin nëse nisnin punimet. Të hënën në mëngjes, prokurori i posaçëm njoftoi se kishte ngritur aktakuzë ndaj ministrit të Kulturës, Nikolla Selakoviq, dhe tre personave të tjerë, për keqpërdorim detyre dhe falsifikim dokumentesh. Qeveria serbe nuk pati koment të menjëhershëm. Ditët e fundit, Vuçiq ka premtuar falje për zyrtarët e përfshirë dhe ka ashpërsuar retorikën kundër prokurorisë, duke këmbëngulur se marrëveshja nuk është politike, por synon transformimin e një zone të degraduar në qendër të qytetit. Shtëpia e Bardhë ka theksuar se Presidenti Trump e konsideron Kushnerin një anëtar të besuar të familjes dhe këshilltar të aftë. /Klankosova.tv