Jeta artistike e Margarita Xhepës me dhjetëra role në kinematografi

Ka ndërruar jetë në moshën 91-vjeçare ikona e kinematografisë shqiptare, Margarita Xhepa, e cila numëron dhjetëra role artistike. Ajo është një nga Zonjat e Mëdha të teatrit e filmit shqiptar që startoi karrierën e saj në vitin 1960 dhe vijoi më pas. Nga viti 1950 u aktivizua si artiste probiste në Teatrin Popullor, sot Teatri Kombëtar, dhe njëkohësisht studioi në Liceun Artistik, në degën e Dramës. Ajo ka realizuar mbi 150 role në teatër, midis të cilëve: Majlindën-Majlinda, Dafina-Lumi i vdekur, Filja-Cuca e Maleve, Zonja Mëmë-Kush e solli Doruntinën, Nëna-Përballë vetes, etj. Margarita Xhepa ka performuar edhe në rolet e dramaturgjisë botërore si, Ofelia tek “Hamleti”, vajza e dytë tek “Mbreti Lir”, dadoja tek “Romeo e Zhuljeta”, mbretëresha Margaret tek “Rikardi III”, Ledi Milfordin në dramën “Intrige e dashuri” (F. Shiler), Melën në dramën “Morali i zonjës Dulska” (G. Zapolska), Dafinën në dramatizimin e romanit “Lumi i vdekur” (J. Xoxa) dhe nënën në inskenimin e romanit të Kadaresë, “Kush e solli Doruntinën”, e shumë të tjerë. Disa prej personazheve që interpretoi gjatë karrierës së saj janë “Vitet e para” , “Gjurmët”, “Dimri i fundit”, “Tokë e përgjakur”, “Pranvera s’erdhi vetëm”, “Koncert në vitin 1936”, “E diela e fundit”, “Një djalë edhe një vajzë”, “Apasionata”, “Gjeneral gramafoni”, “Rrethi i kujtesës”, “Vitet e pritjes”, “Dora e ngrohtë”, “Gurët e shtëpisë sime” dhe “I dashur armik”. Në vitin 2007, aktores iu dha “Çmimi i Karrierës” për rolin e Nadjezhnës në monodramën “Kënga e mjellmës”, ndërkohë është dekoruar edhe me titullin “Artiste e Popullit”, shkruan Top Channel.