Jeta e përditshme e artistit Jeton Gusia, shfaqet përmes një ekspozite në GKK

Të martën në mbrëmje është bërë hapja e ekspozitës së artistit Jeton Gusia në hapësirat e Galerisë Kombëtare të Kosovës. Ekspozita e kuruar nga Blerta Hoçia, mblodhi artistë e artdashës të shumtë për t’i parë nga afër veprat e ekspozuara brenda galerisë, shkruan Klan Kosova.

“Peisazhet urbane, jeta rurale, pjesë nga aktivitete të përditshmërisë, në pishina, në qendra masazhi, në autobus, në mensën e qendrës tregtare; janë copëza dite që e përbëjnë të jetuarit në tërësinë e vet, një botë e vogël e treguar në imtësi, një botë e duruar edhe kur është dhunshme edhe kur një tension nën lëkurë duket se do ta plasarisë telajon e bashkë me të edhe pikturën”, shkruan në njoftimin e GKK-së.

“Duke imituar gjestin dhe formën piktorike të artistit edhe shikimi i punëve në ekspozitë ofrohet në terr, si në hyrjen e një miniere, ku avancimi në brendësinë e galerisë nëntokësore nënkupton pakësimin e dritës që vjen nga jashtë. Kjo mund të shërbejë si një metaforë kuptimplotë ku humbja e dritës së ndërgjegjes shkëmbehet me fitimin e errësirës ose aftësinë për të avancuar më në brendësi të të panjohurave që nuk mundet ti ofrojë vetëdija”.

Ekspozita e titulluar “Idile të Rëndomta të Jetës Moderne” do të qëndrojë e hapur deri më 30 nëntor 2022, shkruan Klan Kosova.

“Vizitori do ta gjejë veten të zhytur në thellësitë e tuneleve brenda të cilave vallëzon një ritëm primordial, ai i pavetëdijes kolektive, ku herë pas here fragmente imazhesh arketipike si idile të pikturuara të përditshmërisë rilindin, duke u shfaqur me thjeshtësinë e jetës së jetuar. Si për të thënë se të vërtetat thelbësore, kuptimet e çmuara gjenden aty para nesh në pamjen e një skene të rëndomtë me personazhet e panumërta që e popullojnë, ku secili subjekt është kuintesenca e asaj që përfaqëson”.