Jimmy Fallon kërkon falje për pretendimet e “mjedisit toksik” të punës

Prezantuesi i njohur Jimmy Fallon i ka kërkuar falje stafit të “Tonight Show” pas akuzave se ai kishte krijuar një mjedis “toksik” pune. “Ndihem aq keq sa nuk mund t'jua them”, tha prezantuesi i famshëm për stafin, shkruan BBC, transmeton klankosova.tv. Krejt kjo erdhi pas një hetimi nga revista “Rolling Stone”, e cila ekspozoi akuza të dëmshme nga stafi aktual dhe i mëparshëm i emisionit televiziv amerikan. Stafi i tha “Rolling Stone” se për vite me radhë ndiheshin të nënçmuar dhe të frikësuar dhe vuajtën shëndetin mendor. Ata e përshkruan sjelljen e Fallonit si “të çrregullt” – në varësi të faktit nëse ai po kalonte një “ditë të mirë” apo një “ditë të keqe”. Sipas hetimit të bërë nga “Rolling Stone”, dhomat e zhveshjes së të ftuarve quheshin si “dhoma për të qarë”. NBC ka lëshuar një deklaratë për këtë çështje, teksa ka thënë se të gjitha çështjet e ngritura nga punonjësit janë trajtuar. “Jemi jashtëzakonisht krenarë për ‘The Tonight Show’, dhe ofrimi i një mjedisi pune të respektueshëm është një përparësi kryesore... Si në çdo vend pune, kemi pasur punonjës që kanë ngritur çështje; ato janë hetuar dhe është marrë masa aty ku ka qenë e nevojshme”, tha në një deklaratë, një zëdhënës i NBC. Megjithatë, disa punonjës aktualë të emisionit i kanë dalë në mbrojtje Fallonit. “Fallon ishte një djalë vërtet, vërtet pozitiv”, i tha revistës “People” një punëtor. “Ai të lavdëron kur bën një punë të shkëlqyer dhe kur është i lumtur”, tha punonjësi, i cili kërkoi të mbetet anonim.