Johnny Depp nis romancë të re dashurie?

Aktori amerikan Johnny Depp thuhet se është duke shijuar një romancë të re dashurie me një avokate nga Londra, të quajtur Joelle Rich. Rich e kishte përfaqësuar aktorin e “Pirates Of The Caribbean” gjatë një seance gjyqësore kundër revistës “The Sun” në Mbretërinë e Bashkuar në vitin 2018, të cilin ai e përfundoi duke e humbur rastin. “Kimia e tyre është e paparashikueshme dhe gjërat mes tyre janë më të vërtetë serioze”, tha një burim i brendshëm për UsWeekly, i cili ishte mes personave të parë që shpalosën historinë e dyshes për publikun, njofton KlanKosova.tv. Gjithsesi, avokatja Rich nuk ishte pjesë e ekipit ligjor që e përfaqësoi Depp në gjyqin e tij për shpifje kundër ish-gruas, aktores Amber Heard, por sipas burimit “ani pse ajo nuk ishte e pranishme në seancë, nga ajo nuk mungoi mbështetja për të dashurin”. Kjo nuk është hera e parë që ylli i kinematografisë, Johnny Depp, përflitet për romanca me gra nga fusha juridike. Kohë më parë, Depp kishte pushtuar lajmet e rubrikës rozë, ndërsa u përfol për një lidhje dashurie me një avokate tjetër, 38-vjeçare me emrin Camille Vasquez, e cila po ashtu ishte pjesë e ekipit përfaqësues të aktorit në gjyqin për shpifje kundër Heard. Por, Vasquez e kishte mohuar kategorikisht “të ketë pasur lidhje me aktorin”. Johny Depp dhe Amber Heard u ndanë në vitin 2017, pasi ishin martuar në vitin 2015.