"Ju dua të gjithëve" u thotë Steven Seagal presidentit Putin dhe aleatëve të tij (VIDEO)

Aktori Steven Seagal përsëriti mbështetjen e tij për Vladimir Putinin dhe aleatët e tij, në një festë në Moskë për ditëlindjen e tij të 70-të. Ylli i disa filmave aksion të Hollivudit, duke përfshirë Under Siege, mori pjesë në një darkë të mbajtur për nder të tij në një restorant në Moskë. Në një video të shpërndarë, Seagal, i cili më parë e quajti Putinin "një nga liderët më të mëdhenj botërorë, apo lideri më i madh botëror i gjallë", shihej duke i quajtur të gjithë në dhomë "familja ime dhe miqtë e mi". "Unë ju dua të gjithëve dhe ne qëndrojmë së bashku, në ditët e këqija dhe të mira", dëgjohej duke thënë Seagal. Lavdërimi i Seagal për Putinin vjen pasi agresioni rus ndaj Ukrainës hyn në javën e gjashtë. Në mars, Seagal tha se ai i sheh Rusinë dhe Ukrainën "si një familje". "Shumica prej nesh kanë miq dhe familje në Rusi dhe Ukrainë. Unë i shoh të dyja si një familje dhe me të vërtetë besoj se është një faktori i jashtëm që shpenzon shuma të mëdha parash për propagandë për të provokuar dy vendet që të jenë në mosmarrëveshje me njëri-tjetrin”, tha aktori. “Lutjet e mia janë që të dy vendet të arrijnë në një zgjidhje pozitive, paqësore, ku ne mund të jetojmë dhe të lulëzojmë së bashku në paqe”, shtoi Seagal. Në vitin 2018, Rusia emëroi aktorin si të dërguar special për të përmirësuar lidhjet me SHBA-të, shkruan Independent, transmeton Klankosova.tv. Ministria e Jashtme ruse tha se përgjegjësia e Seagal do të ishte "lehtësimi i marrëdhënieve mes Rusisë dhe Shteteve të Bashkuara në fushën humanitare, duke përfshirë bashkëpunimin në kulturë, art, shkëmbime publike dhe rinore". Kur Seagal mori nënshtetësinë ruse në vitin 2017, Ukraina ia ndaloi atij të hynte në vend, pasi luftimet mes rebelëve rusë dhe forcave ukrainase u përshkallëzuan në Ukrainën lindore. https://twitter.com/maxfras/status/1513237718720995330