Kapet në Spanjë udhëheqësi i bandës famëkeqe të drogës në Ekuador

Presidenti i Ekuadorit, Daniel Noboa, tha se udhëheqësi i një prej bandave më të mëdha të trafikut të drogës në Ekuador është kapur në një operacion që përfshinte policinë spanjolle. Wilmer "Pipo" Chavarria, kreu i Los Lobos, u ndalua në qytetin e Malagas, sipas Policisë Kombëtare të Spanjës. Presidenti Noboa tha se Chavarria kishte falsifikuar vdekjen e tij, kishte ndryshuar identitetin dhe ishte fshehur në Evropë, ndërsa vazhdonte të kontrollonte operacionet kriminale në Ekuador, duke përfshirë minierat e paligjshme dhe urdhërimin e vrasjeve. Familja e tij kishte pohuar në vitin 2021 se ai kishte vdekur nga një atak në zemër për shkak të Covid. Si Ekuadori ashtu edhe ShBA-ja i kanë shpallur Los Lobos (Ujqërit) një organizatë terroriste. Në një postim në X, ministri i Brendshëm i Ekuadorit, John Reimberg, i cili tha se ndodhej në Spanjë me policinë, tha se kapja e Chavarrias ishte një "ditë historike" për vendin e tij. Los Lobos vlerësohet të ketë 8,000 anëtarë dhe është një nga organizatat më të fuqishme kriminale në Ekuador. Në qershor 2024, thesari i ShBA-së sanksionoi bandën dhe e përshkroi atë si një grup me "mijëra anëtarë" që kishte kontribuar ndjeshëm në rritjen e dhunës në Ekuador. Dhuna dhe vrasjet janë rritur ndjeshëm në Ekuador vitet e fundit, pasi është bërë një qendër e madhe e trafikimit të kokainës dhe bandat rivale konkurrojnë për kontroll. Nuk e prodhon drogën, por ndodhet pranë vendeve kryesore prodhuese të drogës, si Peruja dhe Kolumbia, shkruan BBC, transmeton Klankosova.tv.