Kasami: Tetova foli, tani është radha e komisionerëve të ruajnë votën deri në fund

Pas mbylljes së vendvotimeve, kandidati i koalicionit VLEN për Komunën e Tetovës, Bilall Kasami, ka reaguar me një mesazh drejtuar komisionerëve dhe vëzhguesve zgjedhorë, duke kërkuar ruajtje maksimale të vullnetit qytetar. “Tetova foli. Tani është radha e komisionerëve dhe vëzhguesve ta ruajnë votën e qytetarëve, deri në votën e fundit!”, ka thënë Kasami. Ai ka theksuar rëndësinë e kësaj faze të ndjeshme të procesit zgjedhor – numërimit të votave – dhe ka bërë thirrje për vigjilencë dhe përkushtim maksimal. “Ju ftoj të qëndroni syçelë dhe të përkushtuar deri në fund,” u shpreh më tej kandidati i VLEN-it. Zgjedhjet lokale në Tetovë, të cilat konsiderohen ndër më të rëndësishmet nëMaqedoninë e Veriut, u mbyllën në orën 19:00 dhe tani vëmendja është përqendruar në procesin e numërimit dhe shpalljen e rezultateve./TS