Katër mësimdhënës dhe një nxënës pozitivë me COVID-19, një shkollë në Dragash vijon mësimin online

Shkolla "Ruzhdi Berisha" në Dragash nga sot ka kaluar në skenarin C ose mësimin në distancë. Kjo pas dyshimeve për infektim ku u testuan 50 persona ndërsa pozitivë me COVID-19 rezultuan katër mësimdhënës dhe një nxënës, njofton Klan Kosova Në njoftimin e dhënë nga komuna e Dragashit bëhet e ditur se mësimi nëpër klasa rifillon më 2 nëntor. Njoftimi i plotë: Të nderuar prindër, të dashur nxënës dhe staf i shkollës "Ruzhdi Berisha" në Dragash, pas dyshimeve që kishim rreth infeksionit me COVID-19 të mësimdhënësve të kësaj shkolle dhe njoftimit që pranuam sot nga ISHKPK doli se: Nga 50 mostra të testuara, 4 mësimdhënës dhe 1 nxënëse rezultuan pozitiv. Sipas rekomandimeve të IKSHPK task forca në nivel të DKA-së merr këtë vendim: VENDIM I. Procesi mësimor në Shml "Ruzhdi Berisha" në Dragash me datë 20.10.2020 kalon në skenarin C (mësimi në distancë ) II. Mësimi sipas skenarit A ( me prezencë në shkollë ) rifillon me datë 02.11.2020. III. Për zbatimin e këtij vendimi kujdeset drejtoria e shkollës "Ruzhdi Berisha" në Dragash . Arsyetim Për arsye të infektimit të 4 mësimdhënësve dhe 1 nxënëse të kësaj shkolle me COVID-19, procesi mësimor zhvillohet sipas skenarit C sipas pikës I të këtij vendimi. Pa panik, por me kujdes të shtuar! Task forca në nivel të DKA-së Dragash