Kërkesa e SPAK për imunitetin e Ballukut, mblidhet Këshilli i Mandateve

Këshilli i Mandateve dhe Imunitetit në Shqipëri është mbledhur me dyer të mbyllura për të shqyrtuar kërkesën e SPAK për autorizim për heqjen e imunitetit të zv.kryeministres Belinda Balluku. Prokurorët e SPAK, Dritan Prençi, kreu i ri i Prokurorisë së Posaçme, Klodian Braho, dhe prokurorja Dorina Bejko mbërritën në Kuvend së bashku pak para se të niste mbledhja. Mësohet se Balluku nuk është e pranishme në mbledhje por përfaqësohet nga avokati i saj, raporton Euronews.al, transmeton Klankosova.tv Në relacionin e dorëzuar në Kuvend për heqjen e imunitetit të Ballukut, SPAK ka renditur edhe arsyet se përse kërkon arrestimin e saj. Në mbledhjen e sotme, zv.kryeministrja ka të drejtë të paraqitet vetë ose me avokat mbrojtës për t’u mbrojtur. Rregullorja e Kuvendit nuk parashikon një afat se kur duhet të mbyllet shqyrtimi ndërsa nga mbledhja e fundit e Këshillit, ka maksimumi dy javë kohë për hartimin e raportit, i cili duhet të votohet në seancën e parë plenare. Një ditë më parë, Apeli i GJKKO-së la në fuqi masën e ndalimit të daljes jashtë shtetit për Ballukun, ndërkohë që nuk mori në shqyrtim ankesën për pezullimin nga detyra, për t’i dhënë kohë Gjykatës Kushtetuese të shprehet mbi ankimin e kryeministrit Rama.