Këshilltari i Osmanit për zhvillimet e fundit: Shpatat u drejtuan në drejtim të gabuar

Artan Murati, këshilltari i Vjosa Osmanit, ushtrueses së detyrës së presidentes, ka thënë se ajo çfarë duhet në këto momente në Kosovë pas zhvillimeve të fundit nga Gjykata Speciale dhe pas dorëheqjes së ish-presidentit, Hashim Thaçi, janë veprimet e përbashkëta dhe uniteti politik. Ai ka sqaruar si është me Kushtetuë funskionimi i detyrës së re të Osmanit. "Porse, sidomos gjatë dy-tri ditëve të fundit, shpeshherë shpatat u drejtuan në drejtim të gabuar. Jemi shoqëri demokratike, ku pluralizmi politik e mendimi ndryshe janë vlera të pacënueshme të saj. Pra, është krejtësisht e kuptueshme nëse dikush nuk e pëlqen një figurë të caktuar politike. Mirëpo, ajo cfarë nuk duhet lejuar askush janë rastet kur nuk flitet me gjuhën e ligjit dhe të së drejtës, por me gjuhën e (mos)pëlqimit politik. Rastin konkret e kemi me UD të Presidentes, dhe Kryetaren e Kuvendit, Vjosa Osmani". "Po mundohem me qenë krejtësisht i shkurtë dhe i qartë. Në aspekt kushtetues, nuk ka as edhe një dilemë se Kryetarja e Kuvendit ushtron postin e Presidentit, në rast mungese të këtij të fundit. Terminologjia kushtetuese, fjala “në mungesë”, mbulon edhe dorëheqjen, edhe sëmundjen, edhe cilëndo rrethanë tjetër e cila e pamundëson Presidentin të ushtroj funksionin e tij/saj. Kjo është fryma e nenit 90 të Kushtetutës, e konfirmuar edhe me Aktgjykimin Nr. KO97/10 të Gjykatës Kushtetuese". "Pra, Ushtrimi i Detyrës së Presidentit është veç përgjegjësi shtese, deri në momentin kur Kuvendi është i gatshëm për të zgjedhur Presidentin e ri". "Andaj, ajo çfarë duhet në këto momente janë veprimet e përbashkëta e uniteti politik. Rivaliteti politik është i mirëseardhur, por jo duke u bazuar në të pavërteta", ka shkruar Murati.