Kim Jong Un lavdëron aleancën ushtarake me Rusinë, nderon “çliruesit” e Kurskut

Udhëheqësi i Koresë së Veriut, Kim Jong Un, ka përshëndetur “aleancën e pathyeshme” të vendit të tij me Rusinë, gjatë një ceremonie në Phenian me rastin e një vjetorit të dërgimit të trupave koreano-veriore për të luftuar në luftën e Rusisë kundër Ukrainës. Në ceremoninë e organizuar të enjten, Kim mori pjesë në hapjen e Muzeut Përkujtimor të Trimërive të Operacioneve Ushtarake Jashtë Vendit, që do të nderojë ushtarët koreano-veriorë të vrarë në betejat në rajonin rus të Kurskut, shkruan Aljazeera, transmeton Klankosova.tv. Kim e quajti hapjen e muzeut “ngjarje historike”, duke theksuar se ai do të përfshijë një varrezë, sallë përkujtimore dhe monument për ushtarët që “ranë në mbrojtje të drejtësisë”. Në vitin 2024, ShBA, NATO dhe inteligjenca e Koresë së Jugut kishin raportuar se Koreja e Veriut kishte dërguar trupa për të luftuar krah ushtrisë ruse. Pak më vonë, Kim dhe presidenti rus Vladimir Putin nënshkruan një pakt mbrojtjeje të ndërsjellë, që parashikon ndihmë të menjëhershme ushtarake në rast agresioni ndaj njërës palë. Pheniani ka konfirmuar se trupat e tij kanë marrë pjesë në “çlirimin e rajonit të Kurskut” përkrah ushtrisë ruse. Sipas vlerësimeve të Ukrainës dhe Koresë së Jugut, më shumë se 10 mijë ushtarë koreano-veriorë janë dërguar në Rusi në këmbim të ndihmës ekonomike dhe teknologjike. Megjithatë, humbjet kanë qenë të mëdha. Agjencia e inteligjencës së Koresë së Jugut tha se rreth 2,000 ushtarë nga Koreja e Veriut janë vrarë në betejë, ndërsa Ukraina raportoi më herët se trupat koreane ishin tërhequr pas humbjeve të rënda.