Kina e shqetësuar për përhapjen e mundshme të koronavirusit në Korenë e Veriut, i ofron ndihmë

Presidenti i Kinës ka shprehur shqetësimin për kërcënimin e koronavirusit në Korenë e Veriut dhe i ka ofruar ndihmë. Xi Jinping këtë e tha në një përgjigje pas një mesazhi që mori nga udhëheqësi i Koresë së Veriut, Kim Jong-un, njofton Klan Kosova. Media shtetërore kineze raportoi se Jong-un në mesazhin që i dërgoi presidentit Xi e ka uruar për suksesin e dukshëm të Kinës në luftën kundër Covid-19. Qeveria e Koresë së Veriut pohon se nuk ka pasur asnjë rast të vetëm të konfirmuar atje, megjithëse analistët kanë pyetur nëse është e mundur kjo. Koreja e Veriut ishte vendi i parë që ndaloi turizmin dhe mbylli kufijtë e saj si përgjigje ndaj virusit, në javën e tretë të janarit. Vendi ka një sistem të brishtë shëndetësor, për të cilin ekspertët kanë frikë se do të kolapsojë shpejt edhe nga një shpërthim i vogël i Covid-19.