Kllokoqi: Ka spekulime për numrin e viktimave, ende herët për shifra të sakta (VIDEO)

Sylejman Kllokoqi, kameramani i Associated Press, në lidhje direkte nga Turqia për emisionin  "Info Magazine" foli për situatën aktuale atje pas tërmetit të tmerrshëm. Ai tha se ekipet po punojnë 24 orë pa ndërprerë, për çka thotë se nuk është proces i shpejtë. "Këtu punohet 24 orë, edhe natën me ndriçim, por nuk është proces i shpejtë. Gjatë gërmimeve, momente-momente ndalojnë për të kontrolluar nëse po gjejnë ndonjë trup, e mandej vazhdojnë prapë. Gropimet nuk kanë shkuar deri në fund, por vetëm deri në gjysmë, por gjatë gjithë kohës ka kërkime për të mbijetuar ose trupa e shpresojmë që të gjinden edhe pas shumë ditëve", thotë Kllokoqi. I pyetur për raportimin e numrave të viktimave, ai thotë se numri i viktimave po spekulohet dhe sipas tij është herët të raportohet tërë kohën për viktima, për shkak se numri nuk është i saktë. "Sa i përket numrave të viktimave, po spekulohet për 35 mijë deri 40 mijë. Mendoj se është herët të raportohet për numrin e të vdekurve, sepse nuk është i saktë", shprehet ai. Ndërsa, në lidhje me raportimet e fundit se ka shqiptarë në mesin e viktimave, Kllokoqi thotë se ata janë turq me prejardhje shqiptare, megjithëse numri i saktë i tyre nuk dihet. "Në vendin ku ndodhemi tash në Karakas, ndodhet një lagje me banorë me prejardhje shqiptare, por me nënshtetësi turke, për të cilët thuhen se kanë ndërru jetë, por nuk dihet numri i saktë i tyre. Kjo lagje me turq me prejardhje shqiptare ndodhet në qendër të qytetit, ku i gjithë qyteti prej mbi 1 milion banorë është shkatërruar dhe rrënuar. Shumë banorë janë strehuar edhe nëpër trena dhe janë larguar nga ndërtesat, sepse nuk janë të sigurta", shprehet ai. Mirëpo, situata me familjarët që po presin lajme për të afërmit e tyre të ngujuar ka filluar të tensionohet, për shkak se atyre u ka humbur durimi. "Durimi i familjarëve që presin për të afërmit e tyre të ngujuar nën rrënoja ka humbur, sepse që gati 10 ditë ata presin 24 orë afër ndërtesave se mos po del ndonjë trup. Mëngjeset dhe mbrëmjet janë shumë të ftohta. Afër ndërtesave ka prezencë të policëve dhe ushtarëve për monitorimin e situatës. Të mbijetuarit janë dërguar në spitale dhe shumica janë dërguar në hotele, të cilat janë plot me të mbijetuar", thotë kameramani i AP-së për "Info Magazine", shkruan Klankosova.tv. Ndërkohë, Kllokoqi thotë që nga dita e parë ndihmat nuk ndalen për Turqinë, ku e gjithë bota është ngritur në këmbë për të ndihmuar. /Klankosova.tv https://www.youtube.com/watch?v=EH2qiCkQsW0