Klubi i Biznesit e quan ndërhyrje të drejtpërdrejtë në gjyqësor pezullimin e përmbaruesit privat

Klubi i Biznesit e ka dënuar pezullimin e përmbaruesit privat nga Ministria e Drejtësisë. Në reagim thuhet se ky veprim paraqet një ndërhyrje të drejtpërdrejtë në sistemin gjyqësor dhe paraqet një kërcënim të konsiderueshëm për mjedisin e biznesit në Kosovë. “Gjatë viteve, ka pasur një kontribut të konsiderueshëm nga komuniteti i donatorëve, veçanërisht USAID, për të vendosur një bazë të fortë në gjyqësor, me fokus në çështjet komerciale. Sulmet e qeverisë jo vetëm që minojnë këto arritje, por gjithashtu dërgojnë një mesazh negativ për ata që kanë investuar në ndërtimin e këtyre institucioneve”. “Ne u bëjmë thirrje entiteteve qeveritare të ndalojnë këto sulme të vazhdueshme ndaj gjyqësorit. Një gjyqësor i pavarur është një kusht themelor për një ekonomi të lirë të tregut”, thuhet në reagim, transmeton Klankosova.tv. Tutje, Klubi i Biznesit tha se është thelbësore që qeveria të respektojë dhe të mbrojë pavarësinë e gjyqësorit për të siguruar një klimë të qëndrueshme dhe të favorshme të biznesit në vend. “Klubi i Biznesit mbetet i përkushtuar për të avokuar për një sistem gjyqësor të drejtë dhe të paanshëm, i cili është jetik për prosperitetin dhe rritjen e komunitetit të biznesit dhe ekonomisë në tërësi”, u tha tutje.