Lajmet e fundit
Ministri Gashi, duke shprehur kënaqësinë e të qenit në zyret e KOK-ut, rikonfirmoi mbështetjen e madhe që ka për Lëvizjen Olimpike dhe gjithë federatat tjera.
“Jam këtu më shumë për të dhënë një mesazh mbështetje dhe përkushtimi si qeveri dhe organizatat tjera sportive, që janë pjesë e KOK-ut. KOK është ombrella e sportit në Kosovë dhe jemi të lumtur që kemi një lidership shumë të përgatitur dhe që kanë bërë një punë të jashtëzakonshme vitin e kaluar, dhe me siguri të lartë e them se viti 2018 ishte më i suksesshmi, ku sportistët vendit tonë i sollën rreth 100 medalje. MKRS ka rritur mbështetjen për organizatat sportive prej 1.4 milionë Euro sa ka qenë në vitin vitin 2017 në 3.2 milionë Euro për vitin 2019”, u shpreh ministri, duke vlerësuar lart edhe arritjet në sportet ekipore.
Të dy krerët e institucioneve, i bënë thirrje së bashku Administratës Tatimore të Kosovës, që ta zbatojnë Ligjin për Sponsorizime, si dhe gjithë deputetëve të Kuvendit të Kosovës që Ligjin për të Ardhurat në Korporata ta harmonizojnë me Ligjin për Sponsorizime, në mënyrë që t’i krijojnë hapësirë më të madhe investimeve të biznesit në sport.
Të dy palët u dakorduan që të harmonizohet Ligji për Sport, bazuar në zhvillimet që po ndodhin në Lëbizjen Olimpike Botërore dhe sportin në përgjithësi.
Ministri zbuloi edhe lajmin e mirë për çështjen shumë të përfolur të ndërtimit të Qendrës Nacionale të Xhudos, duke theksuar se bashkarisht me Federatën e Xhudos së Kosovës janë duke shikuar mundësinë e një tjetër alternative të gjetjes së lokacionit për ndërtimin e kësaj qendre, pasi sipas tij, pritjeve të shumta të organeve komunale të Pejës u ka ardhur fundi.
Ministri i dha një lajm të mirë edhe Komitetit Olimpik të Kosovës, për të cilët theksoi vendimin e MKRS që KOK ta shfrytëzojë edhe një kat të objektit të Shtëpisë së Sportit, në mënyrë që të ketë hapësira më të mëdha të punës. Sipas tij, Departamenti i Sportit në MKRS do të zhvendoset në një objekt tjetër.
