Konfirmimi i Sveçlës: Zgjedhje në veri do të ketë, siguria kurrë më e mirë (VIDEO)

Ministri i Punëve të Brendshme, Xhelal Sveçla, raportoi të premten para Komisionit Parlamentar për Integrim Evropian. Tema kryesore në këtë raportim doli të jetë situata në veri të republikës ku pas dhjetë ditëve do votohet. Në Mitrovicë të Veriut, Zveçan, Leposaviq dhe Zubin Potok, më 23 prill pritet të mbahen zgjedhjet për kryetar të komunës. Kurse zgjedhje për kuvende komunale do të zhvillohen në Leposaviq dhe Zveçan, njofton Klan Kosova. “Për ne është imperativ që këto zgjedhje të mbahen në një atmosferë të qetë, të sigurt, qoftë për organizatorët, por edhe për vetë qytetarët atje. Janë çështje të vendimeve politike të subjekteve të caktuara të cilat duan apo nuk duan të marrin pjesë në zgjedhje. Por, me rëndësi është që institucionet e Kosovës janë duke vijuar me organizimin e procesit zgjedhor, ashtu siç është më së miri. Jam i bindur që i gjithë ky proces do të përfundojë i qetë, i suksesshëm duke tejkaluar edhe problemet të cilat i përmenda”, tha Sveçla. Qysh në nisje të raportimit Sveçla dha një lajm që po ndodhte në terren. "Aktualisht, Policia e Kosovës është duke zhvilluar një aksion kundër keqpërdorimeve të energjisë elektrike, duke kultivuar kriptovalutat. Mund të them se është suksesi i radhës”, shtoi ai. “Nuk kemi pasur policë në veri, kemi pasur njerëz me uniforma që ju kemi dhënë armë, e kanë marrë urdhra nga shteti armik. Jemi në proces të rekrutimit të shtetasve tanë, të komuniteteve të ndryshme që kanë filluar trajtimet për t’u bërë pjesë e policisë dhe që do të jenë besnikë. Policia e Kosovës nuk ka humbur asgjë nga dorëheqja e policëve në veri, që i kanë shërbyer Serbisë”, tha mes tjerash njeriu i parë në MPB. Rrini të informuar mbi zhvillimet kryesore duke u bërë pjesë e komunitetit tonë në Viber BONUS: Merreni aplikacionin tonë në Android dhe iOS https://www.youtube.com/watch?v=gr0SgYSg11A