Konfirmohet një viktimë nga djegia e shtëpisë në Gracë të Vushtrrisë

Një grua e moshuar e nacionalitetit serb e ka humbur jetën si pasojë e zjarrit që e ka kapluar një shtëpi në fshatin Gracë të Vushtrrisë. Kjo u konfirmua për Klankosova.tv nga komandanti i Zjarrfikësve të Vushtrrisë Fadil Hyseni. "Operacioni ka përfunduar. Është konstatuar vdekja e viktimës dhe trupi i saj është tërhequr nga ekipet përcjellëse. Zjarrin kemi arritur ta lokalizojmë", deklaroi ai. Për rastin detaje ka dhënë edhe Policia, përmes zëdhënësit rajonal të Mitrovicës, Avni Zaiti. "Me datën 15 janar 2026, rreth orës 22:20, Policia ka pranuar informatën se në fshatin Gracë të Vushtrrisë, një shtëpi banimi është kapluar nga zjarri. Njësitet përkatëse policore dhe zjarrfikëse kanë dalë menjëherë në vendngjarje. Si pasojë e përfshirjes së shtëpisë nga zjarri , në vendngjarje ka humbur jetën viktima femër, e moshës rreth 80-vjeçare. Ekipet emergjente mjekësore kanë konstatuar vdekjen e viktimës në vendin e ngjarjes", tha Zaiti për Klankosova.tv "Hetuesit policorë në koordinim me Prokurorin kompetent janë duke ndërmarrë të gjitha veprimet hetimore për të sqaruar rrethanat e rastit. Me vendim të Prokurorit të Shtetit, trupi i pajetë i viktimës dërgohet në Institutin e Mjekësisë Ligjore (IML) për obduksion", theksoi ai. https://klankosova.tv/zjarr-ne-nje-shtepi-ne-grace-te-vushtrrise-dyshohet-per-nje-viktime/ https://klankosova.tv/zjarr-ne-nje-shtepi-ne-grace-te-vushtrrise-dyshohet-per-nje-viktime/