Koronavirusi: 1 mijë e 486 raste në Kosovë

Të dielën, më 14 qershor në Kosovë janë konfirmuar 49 raste me Covid-19. Me këtë rast numri i të prekurve me koronavirus ka arritur në 1486 raste, nga të cilët janë 33 raste të vdekjes që kanë pasur edhe sëmundje të tjera shoqëruese. Ndërkohë që, numri i përgjithshëm i të shëruarve ka arritur në 953 raste. Instituti Kombëtar i Shëndetësisë Publike ka theksuar se në javën e fundit janë shfaqur raste pozitive në mesin e punonjësve në institucione publike dhe private, agjensione, kompani tregtare dhe biznese private. "Apelojmë te qytetarët, bizneset, gastronomia, që në mënyrë strikte të respektojnë distancën fizike, përdorimin e maskave, dezinfektimin dhe ajrosjen e lokaleve, duke pamundësuar përhapjen eventuale të infeksionit dhe shmangien e përhapjes në hapësirat e mbyllura". "Duke marrë parasysh nevojat e qytetarëve për shërbime shëndetësore, bëjmë apel te punëtorët shëndetësor t’iu përmbahen rekomandimeve të IKSHPK në aplikimin e masave mbrojtëse duke ruajtur kështu shëndetin e tyre, të pacientëve dhe të gjithë qytetarëve të vendit". "Përpjekja e madhe e përbashkët e derisotme mund të na shkojë huq për shkak të pakujdesisë së mos përmbajtes së tri rregullave themelore, të cilat duhet të jenë përditshmëri e jona edhe pa pandemi, e që nënkupton: mbajtjen e distancës fizike, mbajtjen e maskave dhe larjen e duarve me kujdes disa herë në ditë, për 20-30 sekonda", njofton IKSHPK, transmeton Klan Kosova.