Kosova ka shënuar përparim në uljen e vdekshmërisë së fëmijëve në Kosovë, veçanërisht të atyre nën moshën pesëvjeçare. Kështu tregon raporti i fundit nga Grupi i Agjencive të Kombeve të Bashkuara për Vlerësimin e Vdekshmërisë së Fëmijëve.
Ky trend i rënies, sipas drejtorit të Klinikës së Neonatologjisë, Luan Morina tregon për përkushtimin në ofrimin e shërbimeve cilësore.
“Është vënë re një trend pozitiv, i cili bazohet në: Zgjerimin dhe rritjen e kapaciteteve infrastrukturore në neonatologji, trajnimin e stafit dhe ofrimin e monitorimit më të avancuar, përdorimin e teknologjive të avancuara, si për shembull pajisjet për përmirësimin e ventilimit respirator”, thotë pos tjerash Morina.
Po ashtu, raporti pasqyron edhe përpjekjet e institucioneve në hartimin e politikave me fokus nënat dhe foshnjat.
“Do të thotë, Kosova në 10 vitet e fundit ka treguar një sukses me 39% ulje të fëmijëve nën moshën 5 vjeçare. Në krahasim, për shembull, me vitin 2015, afër 15 fëmijë kanë vdekur në 1000 lindje të gjalla, dhe kjo përqindje ka rënë tashmë në 8 në vitin 2024”, thotë Dafina Muçaj, zyrtare për shëndetësi në UNICEF.
Këto rezultate reflektojnë edhe investimet dhe zgjerimin e shërbimeve cilësore në kujdesin parësor. U vlerësua edhe zgjerimi i Programit të Vizitave ndaj nënave dhe fëmijëve në shtëpi.
“Programi për nënat dhe fëmijët ka filluar nga viti 2023. Në kuadër të programit punojmë me katër ekipe: dy paradite dhe dy pasdite. Informatat i marrim nga Klinika e Gjinekologjisë dhe ato private përmes Qendrave të Mjekësisë Familjare. Është shumë e rëndësishme sepse nënat, në bashkëpunim me infermieret, bashkëbisedojnë dhe e përcjellin zhvillimin e fëmijëve”, thotë Afërdita Krasniqi, koordinatore për nëna dhe fëmijë, QKMF.
Sipas raportit, i cili kërkon përshpejtim në parandalimin e vdekjeve të fëmijëve, rreth 4.9 milionë fëmijë nën moshën 5-vjeçare, vdiqën në mbarë botën në vitin 2024./RTK
●●●
VRSHKRIMI NGA
Ve Ra
Editorial nga Klan Kosova — ndjek lajme dhe zhvillimet e tjera kryesore të vendit.
