Kryetari i Partisë Demokratike të Kosovës, Memli Krasniqi, po qëndron për vizitë zyrtare në Maqedoninë e Veriut, ku ka takuar kryeparlamentarin Talat Xhaferi.
Me vizitën e tij në këtë shtet, u pritë nga kryeministri Dimitar Kovaçevski. Këtë të fundit e ka uruar për 31 vjetorin e Pavarësisë dhe e ka falënderuar për ndihmën e vazhdueshme që Maqedonia e Veriut ka dhënë për Republikën e Kosovës. Më pas, Krasniqi ka zhvilluar takim me liderin e Bashkimit Demokratik për Integrim, Ali Ahmeti për të cilin dha fjalë të mëdha.
“Dëshiroj ta përmbyll me një falënderim të veçantë për mbështetjen e z. Ahmeti, për këshillat e tij dhe për gatishmërinë që të jetë gjithmonë pranë dhe në mbështetje të qytetarëve të Kosovës, të institucioneve të vendit tonë, por edhe të PDK-së”, ka thënë Krasniqi.
Kreu i BDI-së, Ali Ahmeti shtoi se Krasniqi po e kryen mirë punën në krye të PDK-së, por nuk e la pa e përmendur dy pararendësit e tij në parti që tash po gjykohen në Hagë.
“ Shpreha dhembshuri që themeluesit kryesorë të kësaj partie padrejtësisht po vuajnë në burgje, por dhe këtu shpreha bindjen time partisë së z. Krasniqi, partisë së z. Thaçi, partisë së z. Veseli, që e drejta do të triumfojë dhe do të kthehen triumfatorë në Kosovë”.
Gjatë vizitës zyrtare në Maqedoninë e Veriut, Krasniqi ka pasur edhe takime e aktivitete tjera.
https://www.youtube.com/watch?v=q9qQ3UIBGtc
●●●
RSHKRIMI NGA
Ramushi
Editorial nga Klan Kosova — ndjek video lajme dhe zhvillimet e tjera kryesore të vendit.
