Kurti: Anëtarësimi në NATO, objektiv strategjik i yni

Kryeministri Albin Kurti tha se anëtarësimi i Kosovës në NATO është objektiv strategjik i vendit. Këto komente, ai i bëri gjatë ceremonisë së transferimit të autoritetit të drejtorit të Ekipit Këshillues dhe Ndërlidhës (NALT) të NATO-s në Kosovë, ceremoni kjo që u mbajt në ambientet Ministrisë së Mbrojtjes. “Anëtarësimi i Republikës së Kosovës në NATO mbetet një objektiv strategjik i yni, dhe progresi që po shënojmë sot e çdo ditë tjetër konfirmon se jemi në rrugën e duhur”, deklaroi Kurti, raporton Klankosova.tv. Ai tha se Kosova ka ndërtuar institucionet e saj të sigurisë mbi bazën e bashkëpunimit të ngushtë dhe të qëndrueshëm me NATO-n dhe shtetet e saj anëtare. Sipas tij, Forca e Sigurisë së Kosovës (FSK) është sot një institucion profesional, i besueshëm dhe në zhvillim të vazhdueshëm, “dhe ky progres është rezultat i përkushtimit të brendshëm, por edhe i mbështetjes së palëkundur të partnerëve tanë, për çfarë u jemi mirënjohës përherë”. Kurti deklaroi se roli i NALT-it në rrugëtimin e Kosovës ka qenë thelbësor. “Përmes këshillimit strategjik, asistencës profesionale dhe bashkëveprimit të përditshëm, NALT ka kontribuar drejtpërdrejt në rritjen e kapaciteteve operacionale, në forcimin e qeverisjes demokratike dhe në ngritjen e standardeve institucionale, si të Ministrisë së Mbrojtjes ashtu edhe të Forcës së Sigurisë së Kosovës”, theksoi më tej kryeministri, teksa shtoi: “E në veçanti, në këtë periudhë të ndjeshme për sigurinë globale, e karakterizuar nga sfida të reja dhe dinamika të paparashikueshme, bashkërendimi i ngushtë me partnerët tanë strategjikë është më i rëndësishëm se kurrë”. Në këtë kuadër, ai tha se prezenca e NATO-s në Kosovë, përmes Ekipit Këshillues dhe Ndërlidhës (NALT), përbën një element kontribuues jo vetëm për sigurinë e vendit, por edhe të mbarë rajonit. Ai vlerësoi edhe kontributin e Drejtorit të deritashëm të Zyrës së NALT-it në Kosovë, Gjeneral Brigade, Sven Lange. “Puna e tij ka lënë gjurmë të qëndrueshme në zhvillimin e Forcës së Sigurisë së Kosovës dhe në konsolidimin e institucioneve tona të mbrojtjes, duke kontribuar në rritjen e besueshmërisë dhe kredibilitetit të Republikës së Kosovës në arenën ndërkombëtare”, theksoi Kurti, teksa shtoi se është i bindur se pasardhësi i tij, Gjeneral Brigade, Thomas Schulte-Borghoff “do të vazhdojë këtë mision me të njëjtin përkushtim dhe profesionalizëm”. “Këtu në Kosovë, në Republikën tonë demokratike do të gjeni një ambient miqësor e të ngrohtë, me institucione të dedikuara për t’i shërbyer paqes dhe sigurisë, lirisë dhe stabilitetit”, tha kryeministri Kurti në fund të fjalës së tij. /Klankosova.tv