Kurti kthehet në bankë shkollore, e luan edhe futboll në sallë (VIDEO)

Buzëqeshja mbizotëronte në fytyrat e nxënësve të shkollës "Luigj Gurakuqi", në Batllavë të Podujevës, të enjten. Gëzimi u përkonte edhe me veshjen, kryesisht të bardhë, që ata bartnin.  Atmosferës i kontribuonte edhe muzika tradicionale që po jehonte, në zë jo të ulët. Përshkrimi që ngjan me ditën e parë të mësimit, në fakt paraqet  ceremoninë që vogëlushët po i bënte me objekt të ri shkollor. Për këtë ata edhe u thirrën, në ditë greve të mësimdhënësve të tyre, të dalin për të pritur kryeministrin, Albin Kurti, që bashkë me vartësen e tij nga dikasteri i Arsimit, Arbërie Nagavci dhe kreun e Komunës, Shpejtim Bulliqi erdhën të prejnë shiritin inagurues. Këta nuk hezituan për të parë punën që ishte kryer brenda. Por, bankat e zbrazëta në fillim shtatori, ia vranë syrin, shefit të ekzekutivit. Ato i mbushi vet, me kolegët e tij. Ftoi të ulet edhe një nxënës që e pati afër, derisa zëri i një të pranishmi mbizotëroi në sallë kur lëshoi një lëvdatë. “Nxënës më të mirë, s’ka pasur kjo shkollë”, tha një burrë. Me kureshtje, objektin e ri po e vështronin edhe vogëlushët, të cilët pengesë për ta shijuar atë e kanë grevën. Kërkesa për ndërprerjen e saj, ishte kryefjala e adresimit të shefit të ekzekutivit, derisa me hodhi cementin e gurthemelit të objektit të ri për shkollën, "Ilir Konushevci" në fshatin Llugë. Thirrjes iu bashkua edhe e para e Arsimit. Të dy, këtë gajle mbase e harruan për pak momente në Batllavë. Kur përuruan një sallë sportive, bashkë me kreun llapjan testuan aftësitë në sport. Kryeministri, tregoi se është gati të luajë me top me vogëlushët, kur zbërtheu sakon që ai bartte. Loja e shkurt u pasua me kërkesat e të pranishmëve për fotografi me Kurtin, që do të mbesnin si kujtim i tri aktiviteteve me shkolla, në kohë greve. https://www.youtube.com/watch?v=5mo2qjYQJ8k