Latifi thotë se Komisioni për shëndetësi nuk e zbeh funksionin e tij por e fuqizon

Ministri i Shëndetësisë, Rifat Latifi thotë se krijimi i Komisionit Ekzekutiv për shëndetësi në kuadër të Qeverisë së Kosovës nuk ia zbeh aspak funksionin e tij si ministër. Këtë komision po e kryeson kryeministri i Kosovës, Albin Kurti. Latifi në një intervistë për KosovaPress, shprehet se aktualisht shëndetësia kosovare ndodhet në krizë, prandaj e sheh tejet të nevojshëm krijimin e këtij komisioni. “Absolutisht jo shumë shtete nëpër botë kanë Health Comition, komision të shëndetësisë. Në realitet kur ka kriza të ndryshme krijon komisione e tilla, ne jemi në krizë ... shëndetësia nuk i takon vetëm ministrit të shëndetësisë, as ministrit financave, asnjë ministrit, i takon gjithë aparatit qeveritarë. Vetëm nëse të gjithë ne jemi në një dhomë, bisedojmë për të njëjtat gjëra, pajtohemi për të njëjtin strategji, ne mund ta zhvillojmë shëndetësinë e Kosovës. Unë sot jam ministër, nesër mund të mos jem po ky komision i cilido ministri, i cilido kryeministri, duhet të vazhdoj të ekzistojë për shkak se e ndihmon shëndetësinë, sikurse kryeministri, Albin Kurti është udhëheqës i disa komisioneve tjera, kështu që absolutisht nuk është zbehje e funksionit tim, mendoj që është fuqizim i funksionit im”, tha ai, transmeton Klankosova.tv. Ministri i Shëndetësisë, Rifat Latifi ka paralajmëruar se brenda dy javës do të hapin konkursin për 30 specializantë.