Liderët kosovarë, të ashpër ndaj paralajmërimeve serbe për targat (VIDEO)

Kanë mbetur vetëm edhe katër ditë. Kryeministri Albin Kurti po u bën thirrje serbëve të Kosovës ta shfrytëzojnë këtë periudhë, para fillimit të zbatimit të vendimit qeveritar për targat, "I ftoj të gjithë qytetarët serbë që i kanë targat e stërvjetërura t'i kthejnë në ato të Republikës së Kosovës", u shpreh Kurti nxitimthi duke hyrë në veturën e tij zyrtare, pas insistimit të gazetarëve, të enjten. Në anën tjetër, përfaqësuesit politikë të serbëve kanë tjetër gjë në mend. Ata kanë paralajmëruar bllokim të rrugëve në veri të vendit më 1 nëntor, nëse Prishtina zyrtare nuk tërhiqet nga vendimi, njofton Klan Kosova. Skenarët që nuk janë të ri në këtë zonë, po i quan me prapavijë ruse, presidentja Vjosa Osmani, derisa akuzon Beogradin për presion ndaj serbëve që po e respektojnë ligjin. "E tëra që po bëjmë është që po e zbatojmë ligjin dhe po i mbrojmë të gjithë qytetarët pa dallim. Dhe si rezultat i kësaj, Serbia po kërcënon me dhunë, me barrikada të cilat siç e dini janë shkelje e lirisë së lëvizjes”, u shpreh ajo. Osmani thotë se kjo situatë, ashtu si krejt procesi i dialogut, bëhet në bashkërendim me aktorët ndërkombëtarë. Kjo pranon se tashmë Kosovës i është prezantuar në pika të trasha iniciativa franko-gjermane, por që priten diskutime me ideatorët në vazhdim. "Do t'i shpjegohet lidershipit të Kosovës më në detaje javët dhe muajt në vazhdim", tha Osmani për planin e shumëpërfolur. Presidentja shtoi se takimet do të mbahen me palën gjermane dhe atë franceze, nën udhëheqjen e Bashkimit Evropian, detaje e të cilave do të bëhen publike më pastaj. https://www.youtube.com/watch?v=I4wEFoawlX0