Lirohen tre policët e kidnapuar, kthehen në shtëpi (VIDEO)

Policia e shtetit që i kidnapoi 12 ditë më parë, i solli deri në pikën kufitare në Merdarë. Aty, tre policët kosovarë ishin fare pak metra larg për t'u kthyer në atdheun e tyre. Rifat Zeka, Beqir Sefi dhe Mustafë Shemi, u liruan të hënën, pasi Gjykata e Kralevës ua konfirmoi aktakuzën e i la të mbrohen në liri, njofton Klan Kosova. Nga automjeti me të cilin erdhën, morën gjësendet personale. Muhabetin e parë e zhvilluan me shefin e Zyrës Ndërlidhëse të Kosovës në Beograd, Jetish Jashari, që i përcolli rrugës së kthimit. Më pas ata kryen kontrollet kufitare tek autoritetet serbe. Destinacioni i parë në kryeqytet ishte objekti i Ministrisë së Punëve të Brendshme. Aty u priten nga kreu i këtij dikasteri, Xhelal Sveçla. Me një komunikatë për media MPB tregoi se gjendja shëndetësore e policëve është relativisht e mirë, por potencohet kurajo për të vazhduar detyrën në mbrojtje të ligjit. Sveçla u zotua që beteja ligjore për këtë rast do të vazhdojë, derisa u kërkua që ai të mbyllet pa kushte dhe në tërësi nga Serbia. Rrini të informuar mbi zhvillimet kryesore duke u bërë pjesë e komunitetit tonë në Viber BONUS: Merreni aplikacionin tonë në Android dhe iOS https://www.youtube.com/watch?v=YVKl8q_4V3A