Lirohet nga paraburgimi Dejan Sllaviq, i dyshuar për krime lufte

Gjykata Themelore në Prishtinë e ka liruar nga paraburgimi Dejan Sllaviqin, i dyshuar se ka kryer krime lufte në fshatin Krushec të Obiliqit. Dejan Sllaviq, i cili deri në vitin 2003 kishte jetuar në Obiliq, ndërsa tani jeton në Llazarevc të Serbisë, është arrestuar në pikën kufitare në Jarinjë më 5 maj dhe atij ishte caktuar masa e paraburgimit prej një muaji. Avokati i Slaviqit Nebojsha Vllajiq ka thënë për Radio Televizionin e Serbisë se gjykata ka marrë këtë vendim me arsyetimin se ai nuk ka pse të mbahet më në paraburgim, transmeton Klan Kosova. Sipas tij, është e mundur që i mbrojturi i tij të jetë arrestuar në vend të një personi tjetër me emër e mbiemër të njëjtë të cilin e kërkon Policia e Kosovës.