Lufta në Gaza, mbi 1300 artistë akuzojnë institucionet kulturore perëndimore për ‘represion’

Më shumë se 1300 artistë kanë nënshkruar një letër duke akuzuar institucionet kulturore në vendet perëndimore për “shtypjen, heshtjen dhe stigmatizimin e zërave dhe perspektivave palestineze”. Aktorja fituese e çmimit Oscar, Olivia Colman dhe fituesit e çmimit Olivier, Harriet Walter dhe Juliet Stevenson janë mes nënshkruesve, shkruan Al Jazeera, transmeton Klan Kosova. Në letër thuhet: “Ne e shohim thellësisht shqetësuese dhe, sinqerisht, tregues të një standardi të dyfishtë shqetësues që shprehjet e solidaritetit, të cilat u janë ofruar lehtësisht popujve të tjerë që përballen me shtypjen brutale, nuk janë shtrirë edhe tek palestinezët”. Artistët i bënë thirrje sektorit të artit dhe kulturës që të bëjë thirrje për një armëpushim, të ngrihet në këmbë për artistët që shprehin mbështetje për të drejtat palestineze dhe përforcojnë punën e artistëve palestinezë. “Lufta për liri nga racizmi për palestinezët dhe hebrenjtë është një luftë e çlirimit kolektiv. Ne refuzojmë të vendosim një komunitet kundër tjetrit dhe qëndrojmë me vendosmëri kundër të gjitha formave të racizmit, duke përfshirë islamofobinë dhe antisemitizmin”, thuhet në letër.