“Lugu” sekuestron edhe 35 gramë kokainë

Policia e Kosovës ka njoftuar se ka zbatuar një urdhëresë të gjykatës ku të premten (29 gusht) janë kontrolluar pesë automjete të sekuestruara në aksionin “Lugu” të 6 gushtit të këtij viti. Sipas njoftimit, thuhet se “gjatë kontrollimit të veturave në prezencë të avokatit mbrojtës, në njërën nga veturat pronë e të dyshuarit mashkull kosovar, janë gjetur dy qese me substancë të dyshuar narkotike të llojit kokainë me peshë të përgjithshme rreth 35 gram”. Në këtë aksion ishin vënë në pranga gjashtë persona të dyshuar dhe ishte konfiskuar një sasi e drogës së llojit kokainë. Të arrestuarit dyshoheshin se janë marrë me shit-blerje të substancave narkotike në rajonin e Prishtinës. “Me datën 06.08.2025 rreth orës 12:00 nën autorizimin e Prokurorisë Themelore dhe me urdhëresë të Gjykatës në Prishtinë, është zbatuar plani operativ ku janë zhvilluar kontrolle në tetë lokacione  (shtëpi, banesa dhe objekte përcjellëse), ku me urdhër të prokurorit është mbyllur edhe një lokal (free shop)”. “Operacioni është mbështetur edhe nga Njësia Speciale Operative, Drejtoria e Teknikës Kriminalistike, njësia K9 si dhe njësitë patrulluese nga rajoni i Prishtinës. Si rezultat i këtij plani operativ janë arrestuar gjashtë persona të dyshuar si dhe në cilësinë e provave materiale janë gjetur dhe sekuestruar: 300 gramë substancë e dyshuar narkotike e llojit kokainë (vlera e së cilës vlerësohet se është rreth 18 000 euro), 13.294 Euro, 2 DVR, dhe 5 vetura me targa vendore si dhe prova tjera materiale që ndërlidhen me rastin”, njoftonte policia në atë kohë. /Klankosova.tv