Lulzim Vokrri: Ma morën pozitën për ta rahatuar drejtorin e Spitalit Aloka (VIDEO)

Këtë vit akademik, Lulzim Vokrri do të dilte para studentëve të Kirurgjisë si profesor. Punën 25-vjeçare të asistentit do ta kurorëzonte me këtë titull akademik nëse komisioni recensues i Fakultetit të Mjekësisë në Universitetin e Prishtinës nuk do t’i bënte shkeljet që pretendon ai. Ky komision i cili Vokrrin e renditi të gjashtin në konkursin e 27 prillit të 2022-ës, në raportin e tij vlerësues të shpallur në Buletinin e Universitetit të Prishtinës, bëri edhe një sugjerim interesant. Komisioni, i kryesuar nga Antigona Hasani, i propozoi senatit që Halit Maloku të zgjidhet profesori i shtatë, ani pse konkursi ishte hapur vetëm për gjashtë pozita. Por, ky propozim nuk u votua nga Senati, i cili e ktheu lëndën në rishqyrtim. KIKS Kosova ka kontaktuar me Hasanin, për të kuptuar se mbi çfarë baze ligjore është bërë ky propozim, por e njëjta ka refuzuar të flasë. Enigmë mbetet edhe vendimi, sipas të cilit, ky komision bëri rivlerësimin e kandidatëve. Tash, në raportin e dytë, në vendin e gjashtë u rendit Halit Maloku, sepse i njëjti komision, pas ankesës së këtij të fundit, ia largoi pesë pikë për monografi Lulzim Vokrrit. Mirëpo, Vokrri insiston se komisioni ia bëri të padrejtë kur e vlerësoi vetëm me pesë pikë për monografi. Pavarësisht kësaj, propozimi i këtij komisioni që tani Halit Maloku të zgjidhet profesor u planifikua të hidhej në votim në mbledhjen e Senatit që u mbajt më 16 nëntor të 2022-ës. Por kjo pikë u hoq nga rendi i ditës me propozimin e ish-ushtrueses së detyrës së rektores, Luljeta Plakolli - Kasumi. Ky propozim u soll prapë në Senat, për t’u hedhur në votim para senatorëve në mbledhjen e 29 dhjetorit. Pavarësisht, insistimit të dekanes së Fakultetit të Mjekëssisë, senatorët votuan për refuzimin e propozimit të komisionit recensues. Vendimi i Senatit e ktheu në pikën zero konkursin për pozitën e gjashtë për profesor të Kirurgjisë. https://youtu.be/RQBw9Cl13lM