“Ma ka ngulë shtrafsigerin” - Biznesmeni e goditi klientin, punëtori e mori përsipër fajin (VIDEO)

Një lojë me top në një pishinë në Vërmicë, u bë shkas i një konflikti që sa nuk përfundoi tragjikisht. Ngjarja ndodhi më 1 korrik 2021. Andi Badalli, së bashku me shokët e tij, po kalonin ditën në një pishinë kur u përfshinë në një konflikt me stafin dhe pronarët e pishinës. Sipas menaxhmentit, loja dhe sjellja e tyre kishte shqetësuar klientët. Sipas dëshmive, përleshja vazhdoi edhe jashtë hapësirës së pishinës. Derisa po largoheshin, të rinjtë u ndoqën. Në rrugë, Andi Badalli u plagos me kaçavidë në shpinë. Versionet për momentin e plagosjes ndryshojnë. Andi Badalli pretendon se u godit nga Unitet Fanaj. Ky i fundit e mohon dhe thotë se goditjen e ka kryer punëtori Muharrem Pulaj. Ndërsa, Pulaj pranon se e ka goditur, duke thënë se veproi në panik. Dëshmitë e palëve nuk përputhen as për praninë e personave në vendin e ngjarjes. Kjo e ka bërë edhe më të paqartë rrjedhën e saktë të incidentit. Pas ngjarjes, të lënduarit morën trajtim mjekësor. Sipas ekspertizës, lëndimet u cilësuan si të lehta trupore. Edhe pse kanë kaluar gati pesë vite, rasti vazhdon të mbetet pa një vendim përfundimtar. Prokuroria Themelore në Prizren ngriti aktakuzë në dhjetor të vitit 2021. Unitet Fanaj dyshohet për sulm dhe lëndim të lehtë trupor, ndërsa edhe disa të tjerë u përfshinë në aktakuzë për lëndime të lehta. Megjithatë, rasti ende nuk ka marrë epilog. Sipas avokatit të Andi Badallit, Gent Gjini, procesi është zvarritur për më shumë se pesë vite dhe janë ndërruar pesë gjyqtarë. Gjini shpreh dyshime edhe për objektivitetin e trajtimit dhe për ekspertizën mjekoligjore. Në anën tjetër, pala mbrojtëse ka zgjedhur të mos komentojë publikisht rastin. Ky rast nxjerr në pah problemet më të gjera të sistemit të drejtësisë. Sipas avokatit Yll Zekaj, rreth 250 mijë lëndë mbeten ende të pazgjidhura në vend. Ai thekson se ngarkesa e madhe, mungesa e angazhimit institucional dhe ndërrimi i shpeshtë i gjyqtarëve po ndikojnë në zvarritjen e proceseve. /Klankosova.tv https://www.youtube.com/watch?v=AUhAd3Z5iOc