Majlinda Kelmendi dhe Nora Gjakova shpërblehen sot, kjo është shuma që do të marrin

Sot do të zhvillohet ceremonia e ndarjes së shpërblimeve shtetërore për xhudistet Majlinda Kelmendi, fituese e Medaljes së Artë në Kampionatin Evropian të xhudos që u mbajt në Rusi, dhe Nora Gjakovën, fituese e Medaljes së Bronztë në këtë kampionat. Në këtë ceremoni, do të shpërblehet edhe trajneri i xhudisteve, Driton Kuka. Në ceremoninë që do të mbahet në kabinetin e ministrit të Kulturës, Rinisë dhe Sportit, Kujtim Shala, fituesja e Medaljes së Artë do të shpërblehet me shumën prej 20 mijë euro, ndërsa fituesja e Medaljes së Bronztë do të shpërblehet me 8 mijë euro, transmeton Klan Kosova. Ndërkaq, trajneri  Kuka do të shpërblehet me gjysmën e shumës së fituesve, 10 mijë, dhe përkatësisht 4 mijë euro, në gjithsej 14 mijë euro. Shpërblimet shtetërore për sportistët që arrijnë rezultate kulmore ndahen në bazë të Rregullores Nr. 15/2013 për ndarjen e shpërblimeve shtetërore për sportistët që arrijnë rezultate kulminante në garat ndërkombëtare.