Maratona gatimi 100-orëshe e shefes nigeriane, është zyrtarisht rekordi botëror

Një kuzhiniere nigeriane është zyrtarisht mbajtëse e rekordeve Guinness pasi ka kaluar 93 orë e 11 minuta radhazi duke gatuar. Guinness njoftoi se Hilda Effiong Bassey, 26 vjeçe, e njohur ndryshe si Hilda Baci, fitoi rekordin për maratonën më të gjatë të gatimit (individuale) kur kaloi katër ditë në kuzhinë dhe gatoi më shumë se 100 tenxhere me ushqim. Baci kishte synuar rekordin prej 100 orësh, por gati 7 orë u zbritën nga gjyqtarët e rekordeve botërore Guinness sepse ajo mori aksidentalisht minuta shtesë gjatë një pushimi në fillim të përpjekjes së saj. Totali më i vogël ishte ende i mjaftueshëm për të thyer rekordin e mëparshëm prej 87 orë e 45 minutash, i cili u vendos nga Lata Tondon nga India në vitin 2019. Baci u lejua të kishte nga një asistent dhe një pushim 5-minutësh çdo orë, të cilat ajo u lejua t’i grumbullonte për pushime më të gjata. Pjatat e shefes së kuzhinës gjatë maratonës së saj të gatimit përmbanin ushqime tradicionale nigeriane, duke përfshirë oriz jollof dhe akara, një pjatë e bërë me fasule pure. Baci tha për Guinness World Records se ajo kishte për qëllim ta "vendoste kuzhinën nigeriane në hartë" dhe "t’i frymëzonte gratë e reja afrikane për t’i ndjekur ëndrrat e tyre". “Vendosa gjithashtu ta thyej këtë rekord për t’i shtyrë vërtet kufijtë e mi dhe për t’i testuar aftësitë e mia”, tha ajo. *Klikoni KËTU për t’u bërë pjesë e kanalit zyrtar të Klan Kosovës në Viber. *Klikoni KËTU për ta shkarkuar aplikacionin e Klan Kosovës në Android, dhe KËTU për iOS.